Nais kong magbigay-tinig

NAIS KONG MAGBIGAY-TINIG

bilang tibak, nais kong bigyang tinig

ang maralitang animo'y nabikig

ang mga api't winalan ng tinig

ang pinagsamantalaha't ligalig

nilalayon ko bilang maglulupa

ang sila'y aking makasalamuha

at sa isyu sila'y mapagsalita

nang karapata'y ipaglabang sadya

bilang makata, aking inaalay

ang aking mga tula't pagsasanay

upang tinig ng dukha'y bigyang buhay

pagkat bawat tula'y kanilang tulay

tungo sa isang bayang makatao

sa lipunang ang palakad ay wasto

sa bansang di sila inaabuso

sa sistemang patas at di magulo

sa ganyan, buhay ko'y nakalaan na

ang bigyang tinig ang kawawa't masa

hustisya'y kamtin at pakinggan sila

ang baguhin ang bulok na sistema

- gregoriovbituinjr.

03.22.2024

* litrato ay notbuk ng makatang gala

Kapara mo'y isang tula

i.

kapara mo'y isang tula

na sa panitik ko'y mutya

ako'y tinanggap mong sadya

kahit dukha'y walang wala

sa puso ko'y ikaw lamang

ang laging pinaglalaban

diwa kitang tutulaan

tungong paglaya ng bayan

ii

ikaw ang aking tinta

sa buhay ko'y pag-asa

ako'y di na mag-isa

pagkat kita'y kasama

- gbj,03.21.2024

world poetry day

Tingnan ang dinaraanan

TINGNAN ANG DINARAANAN

tingnan ang dinaraanan

sa gubat ng kalunsuran

o lungsod sa kagubatan

baka may ahas na riyan

pag nakaapak ng tae

tiyak babaho na rine

ibig sabihin, salbahe

kang may kaibang mensahe

ingat, baka ka madulas

sa iyong paglabas-labas

saan mang gubat, may ahas

saan mang lungsod, may hudas

may kasabihan nga noon

dapat marunong lumingon

sa pinanggalingang iyon

may utang kang buhay doon

isang kasabihan pa rin

na dapat nating namnamin:

ang lumakad ng matulin

kung matinik ay malalim

- gregoriovbituinjr.

03.21.2024 world poetry day

Alay sa World Poetry Day

ALAY SA WORLD POETRY DAY

matulain ang araw na kinakaharap

na puno ng awit sampu ng pinangarap

tila diwa'y nakalutang sa alapaap

bagamat tigib ng lumbay ang nasasagap

pinangarap ng makatang mundo'y masagip

sa unos ng luha't sa matang di masilip

laksang mga kataga'y di basta malirip

na mga talinghaga'y walang kahulilip

ipaglalaban ang makataong lipunan

nakakaumay man ang ganyang panawagan

subalit iyan ang adhikain sa bayan

pati tugma't sukat sa bawat panagimpan

sa mga manunula, ako'y nagpupugay

habang patuloy pa rin ditong nagninilay

lalo na't mga nakakathang tula'y tulay

sa pagitan ng madla't nagkaisang hanay

- gregoriovbituinjr.

03.21.2024

Bakit?

BAKIT?

bakit ba tuwang-tuwa silang ibukaka

sa mga dayuhan ang ating ekonomya?

bakit payag na gawing sandaang porsyento

na ariin ng dayuhan ang ating lupa?

kuryente, tubig, edukasyon, at masmidya?

bakit natutuwang iboto't makapasok?

yaong dayuhang mamumuhunan kapalit

ng lupaing Pinoy na mapasakanila?

bakit ba natutuwa silang pagtaksilan

ang mamamayan para sa dayong puhunan?

binoto ba nati'y wala nang karangalan?

bakit ba natutuwang ibenta ang bayan?

sa dayuhang kapital, ito'y kaliluhan!

tangi ko lang masasabi, tuloy ang laban!

- gregoriovbituinjr.

03.21.2024 world poetry day

* litrato mula pahayagang Abante, 03.21.2024, p.3

Sa bisperas ng World Poetry Day

SA BISPERAS NG WORLD POETRY DAY

taaskamao akong sumama sa rali

itinula ang nasasaloob ko sabi

iyon ang gawaing aking ikinawili

ang nasasadiwa'y itula kong mensahe

patuloy kong itutula ang laksang paksa

lalo't isyu ng manggagawa't maralita

tutula sa piketlayn man ng manggagawa

ilarawan ang kalagayan nilang sadya

sa bisperas ng World Poetry Day, nais ko

pa ring itula'y paninindiga't prinsipyo

na maitayo ang lipunang makatao

walang magsamantala ng tao sa tao

sa lahat ng makata, ako'y nagpupugay

tula ng tula, mabuhay kayo, MABUHAY!

sa toreng garing man ay wala tayong tunay

ang masa'y kasama natin sa paglalakbay

- gregoriovbituinjr.

03.20.2024

* litratong kuha ng makatang gala sa rali patungong House of Representatives, anti-ChaCha rali, Marso 20, 2024

5 atletang Pinay, pararangalan

5 ATLETANG PINAY, PARARANGALAN

limang mahuhusay na atletang kababaihan
sa Unang Women in Sports Awards pararangalan
ito'y katibayan na anuman ang kasarian
ay makikilala rin sa pinili mong larangan

una si Olympic gold medalist Hidilyn Diaz,
sunod ay si volleyball superstar Alyssa Valdez,
ang iba pa'y sina skateboarder Margielyn Diaz,
billiard queen Rubilen Amit, mountain climber Carina

Dayondon, sa kanila'y talaga ngang hahanga ka
wala pa riyan si tennis star Alex Eala
sa kasalukuyan ay binibigyang sigla nila
ang isports ng bansa kaya sila'y kinikilala

sa limang magigiting, taospusong pagpupugay
sa pinasok na larangan, patuloy na magsikhay
hanggang inyong marating ang tugatog ng tagumpay
muli, sa inyong lima, mabuhay kayo! MABUHAY!

- gregoriovbituinjr.
03.20.2024

* balita mula sa pahayagang Pang-Masa, Marso 19, 2024, pahina 8