Pambihirang pagkakataon

PAMBIHIRANG PAGKAKATAON

binigay ng kasaysayan ngayon

ay pambihirang pagkakataon

noon, labanan ng mga trapo

ngayon, pagkakataon na ito

kandidatong Pangulo'y obrero

Manggagawa Naman ang iboto!

ito'y di natin dapat sayangin

kasaysayan na'y panig sa atin

Ka Leody de Guzman, Pangulo

Ka Walden Bello, Bise Pangulo

para Senador, Luke Espiritu

Roy Cabonegro at D'Angelo

kandidatong palaban talaga

dala'y Partido Lakas ng Masa

mapanuri, makakalikasan

at nakikibaka sa lansangan

para sa karapatan ng bayan

para sa hustisyang panlipunan

h'wag sayangin ang pagkakataon

ipanalo natin sila ngayon!

- gregoriovbituinjr.

03.30.2022

Latang titisan

LATANG TITISAN

ah, nakakatuwa ang titisan

na gawa sa latang walang laman

Master Sardines pa ang pinaglagyan

sa mga Master, may panawagan:

"Master, narito po ang titisan

Upos mo'y dito po ang lagayan

Titis ng yosi'y pagtataktakan

Ano, Master, maliwanag iyan!"

di tapunan ang kapaligiran

di basurahan ang kalikasan

simpleng ashtray ang latang titisan

nang sa bayan, makatulong naman

at dahil dito'y pakatandaan

maging sagisag ng kalinisan

gamiting maayos ang titisan

para sa kabutihan ng bayan

- gregoriovbituinjr.

03.29.2022

Libingan at kapak

LIBINGAN AT KAPAK

Talinghaga nina Gat Emilio Jacinto at Huseng Batute animo'y pinagtiyap. Ayon sa bayaning Jacinto sa ikatlong paksa ng kanyang akdang Liwanag at Dilim:

"Tayo'y huwag mainaman sa balat pagkat di kinakain at karaniwang magkalaman ng masaklap. Ang mga libingang marmol ay maputi't makintab sa labas; sa loob, uod at kabulukan."

Ayon naman sa makatang Jose Corazon de Jesus, na kilala ring Huseng Batute, sa ikalawang saknong ng kanyang tulang pinamagatang "Pagtatanghal" sa aklat na Jose Corazon de Jesus: Mga Piling Tula, pahina 82:

"Ano ang halaga ng ganda ng malas,

di gaya ng tago sa pagkakatanyag,

huwag mong tularan yaong isdang kapak, 

makisap ang labas, sa loob ay burak."

Anong tindi ng pagkakawangki ng kanilang talinghaga, kaya ako'y napaisip, at sa tuwa'y napagawa ng tula:

dalawa kong iniidolo

talinghaga'y halos pareho

bayaning Emilio Jacinto

at makatang Batute ito

sa labas, bagay na maganda

ay hinahangaan tuwina

ngunit huwag tayong padala

pagkat loob ay bulok pala

anong tindi ng pagmamasid

pagsusuri'y kanilang batid

pamanang sa atin ay hatid

upang sa dilim di mabulid

mga gintong palaisipan

para sa ating kababayan

nagmula sa kaibuturan

ng kanilang puso't isipan

taospusong pasasalamat

sa nabanggit na mga aklat

na kung iyong mabubulatlat

may gintong diwang masasalat

- gregoriovbituinjr.

03.27.2022

Tula sa Earth Hour

TULA SA EARTH HOUR

nagpatay kami ng ilaw ngayon

dahil Earth Hour, mabuting layon

kaisa sa panawagang iyon

nakiisa sa magandang misyon

na sa pamamagitan ng dilim

maunawaan natin ang lalim

ng kalikasang animo'y lagim

pagkasirang nakaririmarim

imulat natin ang ating mata

upang kalikasan ay isalba

nagpabago-bago na ang klima

ang tao ba'y may magagawa pa

buksan din natin ang ating bibig

upang mapanira ay mausig

halina't tayo'y magkapitbisig

at iligtas ang ating daigdig

- gregoriovbituinjr.

03.26.2022

* litrato mula sa google

Espasyong ligtas

ESPASYONG LIGTAS

espasyong ligtas ba ang M.R.T.

sa mga ginang at binibini

laban sa tarantado't salbahe

na kung makatingin ay buwitre

parang lalapain ang babae

buti't M.R.T.'y may paalala

na doon ay ipinaskil nila

Safe Spaces Act, tandaan mo na

sa text, facebook, saanmang lugar pa

bawal ang pambabastos talaga

salamat sa M.R.T. sa paskil

paalalang dapat magsitigil

ang sa social media'y nanggigigil

sa M.R.T. mismo'y di magpigil

sa kanilang libog, dagta't pangil

nais natin ng espasyong ligtas

kung saan wala nang mandarahas

mandarambong, trapong sukab, hudas

kundi lipunang pantay, parehas

na namumuhay tayo ng patas

- gregoriovbituinjr.

03.26.2022

* litratong kuha ng makatang gala habang nag-aabang ng tren sa M.R.T.

Titisan

TITISAN

gumawa pang muli ng titisan

o ashtray upang mapagtapunan

ng upos at titis ng sinumang

nagyoyosing madalas o minsan

iaambag ang titisang iyon

sa mga opisina - ang misyon

upos at titis, ilagay doon

na sa kalikasan din ay tulong

salita'y itinataguyod din

na may salin na sariling atin

na maganda ring ating gamitin

di pulos ashtray na iinglesin

tulad ng tibuyo sa alkansya

banoy naman para sa agila

at sa iskor at tally ay para

sa ashtray ay may titisan pala

wikang sarili'y ipalaganap

ito'y itaguyod nating ganap

wikang pangmasa sa pag-uusap

unawain ito't ipalasap

ganito sa tulad kong makata

gamit sa kalikasan at diwa

itaguyod, sariling salita

wika ng bayan, wika ng madla

- gregoriovbituinjr.

03.25.2022

Pagsasalin ng haiku

PAGSASALIN NG HAIKU

Nakabili ako ng libro ng haiku ng makatang Hapones na si Matsuo Basho noong Abril 13, 2019 sa halagang P80.00. Nilathala ito ng Penguin Classics. Naitago ko ang librong ito at nakita muli. Binasa ko ang ilan niyang haiku na pawang salin na sa Ingles. 

Sinubukan kong isalin sa wikang Filipino ang lima niyang haiku sa paraan ding iyon na pantigang 5-7-5. Pinili ko lang ang isinalin dahil ang iba'y hindi kayang ipasok sa 5-7-5 dahil sa mahahabang salita natin. Na marahil sa wikang Hapones,  maraming salitang iisa ang pantig na pasok na pasok sa kanilang haiku.

p. 28

Whiter than stones (Ang Batong Bundok)

of Stone Mountain - (maputi pa sa bato -)

autumn wind. (hanging taglagas.)

p. 31

Where cuckoo (Nang ibong kuku)

vanishes - (ay tuluyang naglaho -)

an island. (ang isang pulo.)

p. 38

Violets - (Ang mga lila -)

how precious on (kayhalaga sa landas)

a mountain path. (ng kabundukan.)

p. 47

Come, see real (Halika, tingni

flowers (ang bulaklak sa mundong)

of this painful world. (napakasakit.)

p. 49

Crow's (Ang iniwanang)

abandoned nest, (pugad ng isang uwak,)

a plum tree. (puno ng duhat.)

Isa siyang inspirasyon. Pawang mula sa kalikasan ang kanyang mga haiku. Dahil dito, kumatha rin ako ng una kong limang haiku.

1

Langay-langayan

pagkatuka'y lilipad,

parang tulisan!

2

Ang mga langgam

ay sadyang kaysisipag,

mumo na'y tangay!

3

Daga sa bahay,

takbuhan ng takbuhan,

kisame'y luray.

4

Sa tinding usok,

napuksa ba ng katol

ang laksang lamok?

5

Pusa'y humibik,

nang mabigyan ng tinik

agad humilik.

- gregoriovbituinjr.

03.25.2022

Lakbay

LAKBAY

naglalakbay muli ang diwa

sa naroong di matingkala

na pilit kong inuunawa

pagkat sanhi ng mga gatla

kung saan-saan na sumakay

ang diwang patuloy sa nilay

sa dyip, sa tren lumulang tunay

sumakay ng di mapalagay

anong kahulugan ng bulok

at pagbaligtad ng tatsulok

dahil ba trapo'y nasa tuktok

na nananalo kahit bugok

bakit nga ba kalunos-lunos

ang buhay ng api't hikahos

saan kukunin ang pantustos

kung mga dukha'y laging kapos

lipunan pa ba'y aaralin?

kayhaba ba ng lalakbayin?

mga tulay ba'y tatawirin?

at tula ba'y patatawarin?

- gregoriovbituinjr.

03.24.2022

Kaytinding virus

KAYTINDING VIRUS

bago pa ang pandemya ng COVID

ay dama na sa mundo't paligid

ang virus na kaytinding pumatid

ng buhay ng maraming kapatid

kaytinding virus, di matugunan

at di rin ito mapag-usapan

dahil dukha lang ang tinamaan?

at di ang mayayamang iilan?

mabuti pa nga ang COVID 19

at buong mundo'y nagbigay pansin

laksa'y namatay, mayayaman din

walang sinino ang COVID 19

ngunit ang virus ng kagutuman

na naging salot sa daigdigan

pumatay ng laksang mamamayan

ay di man lang napapag-usapan

bakit? bakit ganyan ang naganap?

dahil tinamaan ay mahirap?

at di mayayamang tuso't korap?

pag kagutuman, walang mangusap!

subalit pagkain ang bakuna

paglutas dito'y di ba makaya?

dahil kapitalismo'y sistema?

mapangyurak sa dangal ng masa?

nalalantad ang katotohanan

mayaman kasi'y di tinamaan

kaya di mabigyang kalutasan

ang virus: ngalan ay KAGUTUMAN!

- gregoriovbituinjr.

03.24.2022

* litrato mula sa google

Sama-samang pagkilos

SAMA-SAMANG PAGKILOS

may kakamtin din tayo sa sama-samang pagkilos

upang mawakasan ang sistemang mapambusabos

upang makaalpas sa buhay na kalunos-lunos

upang guminhawa ang buhay ng kapwa hikahos

walang manunubos o sinumang tagapagligtas

ang darating, kundi pagkilos, samang-samang lakas

maghintay man tayo, ilang taon man ang lumipas

kung di tayo kikilos, gutom at dahas ang danas

mga kapwa api, kumilos tayong sama-sama

at iwaksi na ang  mapagsamantalang sistema

kaya nating umunlad kahit wala ang burgesya

na sa masa'y deka-dekada nang nagsamantala

kapara nati'y halamang tumubo sa batuhan

na di man diniligan, nag-aruga'y kalikasan

tulad ng mga dahong sama-samang nagtubuan

kumilos tayo't baguhin ang abang kalagayan

sa sama-samang pagkilos, tagumpay ay kakamtin

ito'y katotohanang sa puso't diwa'y angkinin

dudurugin ang sistemang bulok, papalitan din

ng makataong lipunang pinapangarap natin

- gregoriovbituinjr.

03.23.2022

A Walk for Ka Leody...

A WALK FOR KA LEODY,

WALDEN, AND THEIR LINE UP

IS A WALK FOR CLIMATE JUSTICE

4.22.2022 (Earth Day)

7am-12nn

from Bonifacio Monument in Caloocan

to Bantayog ng mga Bayani in QC

to People Power Monument in Mandaluyong

with Poetry Reading of Tagalog poems

Concept:

This activity is a walk and awareness campaign which will be held on Earth Day, 4.22.2022, for our candidates less than three weeks before the May election.

Presidential candidate Ka Leody de Guzman joined us during our Climate Walk from Luneta to Tacloban in 2014, a year after supertyphoon Haiyan, popularly known as Yolanda, landed in the Philippines that killed more than 5,000 people. Ka Leody also spoke about climate emergency and also calls for climate justice.

Vice Presidential candidate Walden Bello is an internationally known activist who has written many topics on economy and ecology.

Candidates for Senator Atty. Luke Espiritu and the two known environmentalist Roy Cabonegro and David D'Angelo is also knowledgeable and actively campaining in this respect and can clearly explain their call for climate justice to the masses.

Ka Lidy Nacpil, an internationally known activist fighting for several decades now for Climate Justice, is the second nominee of PLM Partylist.

Let's join us in this Walk for Climate Justice on Earth Day, because "A Walk for Ka Leody, Walden, and their line up is a WALK FOR CLIMATE JUSTICE!"

Mechanics ng nasabing Alay-Hakbang para sa Klima:

Ang paglalakad ay sisimulan ng mga volunteer, na maaaring lima hanggang sampung katao. May hawak na malaking banner na nakasulat ang: "A Walk for Ka Leody, Walden, and their line up is a WALK FOR CLIMATE JUSTICE”. 

Upang hindi masyadong hingalin ang mga maglalakad o sasama sa Alay-Hakbang para sa Klima, maaaring may magsimula lamang mula Bonifacio monument hanggang Balintawak market, at papalitan na sila ng isa pang set ng maglalakad.

Istasyon ng paglalakad:

(1) Magsisimula ang paglalakad mula sa Monumento ni Gat Andres Bonifacio sa Lungsod ng Caloocan hanggang Balintawak market. Pahinga ng sampung minuto.

(2) Paglalakad mula Balintawak market hanggang SM North. Pahinga ng sampung minuto.

(3) Paglalakad mula SM North hanggang Bantayog ng mga Bayani. Pahinga ng sampung minuto.

(4) Paglalakad mula Bantayog ng mga Bayani hanggang Farmers, Cubao. Pahinga ng sampung minuto.

(5) Paglalakad mula Farmers, Cubao hanggang People Power Monument.

Magkakaroon ng munting programa sa People Power Monument. Kasabay nito’y ang Tulaan sa Earth Day, kung saan ang mga tula ay batay sa facebook page na 60 Green Poems for April 22 and for our Green Candidates. 

Nawa’y mahilingan nating magsalita sa aktibidad na ito ang ating mga kandidatong sina Ka Leody de Guzman, Ka Walden Bello, Atty. Luke Espiritu, at syempre ang dalawa nating environmental senatoriables na sina Roy Cabonegro at David D’Angelo.

Bukod sa tulaan sa nasabing paglalakad, ang gabi ng April 22 ay inilaan natin para sa TULAAN o poetry reading sa BMP-KPML office sa Lungsod ng Pasig. 

Hiling po namin ang inyong suporta sa gawaing ito. Mabuhay kayo!

Greg Bituin Jr.

participant, Climate Walk from Luneta to Tacloban (October 2, 2014 - November 8, 2014)

participant, French leg of the People's Pilgrimage from Rome to Paris (November 7, 2015 - December 14, 2015)

Ka Luke Espiritu

KA LUKE ESPIRITU

si Ka Luke Espiritu

hindi lang abogado

siya'y lider-obrero

ilagay sa Senado

palaban, mapanuri

prinsipyado, may mithi

sa bayan at sa uri

iboto't ipagwagi

kasangga ng paggawa

at mga maralita

may mabuting adhika

may layuning dakila

para sa sambayanan

para sa kalikasan

Luke Espiritu naman

ang Senador ng bayan

- gregoriovbituinjr.

03.20.2022

Upos

UPOS

napakasimple lamang ng paskil

ngunit, datapwat, nakagigigil

na pinagtatapunan ng sutil

ng upos ang halaman, suwail

huwag naman ninyong pagtapunan

ng upos ang nariyang halaman

di naman iyan dapat paglagyan

ng upos n'yo't gawing basurahan

paalala lang sa hitit-buga

mga upos n'yo'y ibulsa muna

na balat ng kendi ang kagaya

pakiusap lang itong talaga

ashtray o titisan ay ilagay

mas mabuti ang ganitong pakay

pag may titisan ay naninilay

upos ay doon lamang ilagay

nagpapasalamat kaming taos

kung may titisang naisaayos

kung doon itatapon ang upos

may nagawa tayong tama't lubos

- gregoriovbituinjr.

03.18.2022

Save Diliman Creek

SAVE DILIMAN CREEK

pinta sa pader: Save Diliman Creek

alamin natin ang natititik

sapa bang ito'y hitik na hitik

sa dumi, upos, basura't plastik

nadaanan ko lang naman ito

at agad kinunan ng litrato

upang maipaalam sa tao

na may problema palang ganito

paalala na iyon sa bayan

panawagang dapat lang pakinggan

tungong "Malinis na Katubigan"

pati "Luntiang Kapaligiran"

pakinggan mo ang kanilang hibik

anong gagawin sa Diliman Creek?

tanggalan na ng basura't plastik!

ang sapang ito'y sagiping lintik

"Save Diliman Creek" ay ating dinggin

sapagkat kaytinding suliranin

magsama-samang ito'y sagipin

dapat linisin, ang wasto'y gawin

sana naman ay dinggin ng madla

maging ng pamahalaan kaya

ang ganitong problema sa bansa

upang masolusyunan ng tama

- gregoriovbituinjr.

03.18.2022

Bedyetaryan

BEDYETARYAN

mahirap ding mag-vegetarian at budgetarian

kahit pinili mo iyon para sa kalusugan

bagamat dapat ka ring magtipid paminsan-minsan

pagkat kaymahal na rin ng gulay sa pamilihan

ayoko nang magkarne bagamat may isda pa rin

sinusubukan, ginagawa ay gulay at kanin

pagkat makakalikasan daw ito kung isipin

bagong estilo ng pamumuhay ba'y kakayanin

maliit ngang mineral water, kaymahal, tingnan mo

bente-singko pesos ang maliit na boteng ito

kumpara sa isang galon na nasa treynta-singko

aba'y iyan kasi ang batas ng kapitalismo

kaya magandang magtanim-tanim na rin ng gulay

upang may mapitas na kakainin balang araw

kung nasa lungsod ka'y sa paso magtanim ng gulay

kaysa nakatingala lang sa ilalim ng araw

bilang paghahanda kung pandemya'y muling humataw

- gregoriovbituinjr.

03.17.2022

Selfie

SELFIE

ako'y agad nakipag-selfie

nang makita siya sa rali

ako'y natuwa't di nagsisi

sa kandidatong nagsisilbi

sa masa't sa kapaligiran

pambatong makakalikasan

kandidato ng mamamayan

ibotong Senador ng bayan

si David D'Angelo siya

pambatong Senador ng masa

na ang partidong nagdadala

ay Partido Lakas ng Masa

matitindi ang talumpati

basura raw ay di umunti

pati klima'y bumubuhawi

magsilbi sa bayan ang mithi

may babalang nakakatakot

hinggil sa klima, kanyang hugot

two degrees ay baka maabot

sa walong taon, anong lungkot

hangga't sistema'y di magbago

habang klima'y pabago-bago

nais ni David D'Angelo

dalhin ang isyu sa Senado

ito'y isyu mang daigdigan

ay dapat lang mapag-usapan

si D'Angelo'y kailangan

at ipanalo sa halalan

- gregoriovbituinjr.

03.17.2022

* selfie ng makatang gala

noong Araw ng Kababaihan

Pakiusap

PAKIUSAP

kaygalang nilang makiusap

bagamat masakit malasap

basahin mo sa isang iglap

tila puso'y hiniwang ganap

pakiusap lang po sa iyo

huwag naman ilagay dito

iyang anumang basura mo

mahiya ka naman, O, ano?

kalinisan o kababuyan?

kalikasan o basurahan?

kapaligiran ba'y tapunan?

anong tingin ng mamamayan?

basura'y saan ilalagay?

o di rin tayo mapalagay?

pakiusap man, lumalatay

sa ating budhi'y lumuluray

kaya ano nang dapat gawin

kundi paligid ay linisin

pagtatapunan ba'y saan din

pag-usapan ninyo't sagutin

- gregoriovbituinjr.

03.15.2022

* litratong kuha ng makatang gala sa isang napuntahang pamayanan

Tandang

TANDANG

anang tandang: "Mag-uumaga na!"

sa kanyang pagtilaok kanina

madaling araw pa'y ninikat na

si Pebo o Araw sa probinsya

halina't magbubukangliwayway

anong ganda ngayon ang magnilay

dapat kayong kumain ng gulay

nang katawan, lumakas na tunay

at ang mga tao'y nagsibangon

nag-inat, inalam petsa ngayon

nagmumog, naghilamos, naroong

nagluto na ng agahan doon

habang sa kisame pa'y tumitig

muna ang makatang nakiniig

sa diwatang kayganda ng tinig

sinasabayan niya ang himig

lumabas na rin siya sa kwarto

agad na nagmumog, nagsipilyo

nag-almusal, naligo ng todo

naghandang pumasok sa trabaho

ah, maraming salamat sa tandang

sa gawa sa umagang sumilang

sila ang mga hari sa parang

tumitilaok ng buong galang

- gregoriovbituinjr.

03.15.2022

Sa ikatlong Mathematics Day

SA IKATLONG MATHEMATICS DAY

three point one four one five nine two seven pa'y kabisado

subalit ito'y three point one four lang pag ni-round off mo

three point one four, parang ikalabing-apat ng Marso

na pinagbatayan ng Mathematics Day na ito

Maligayang Mathematics Day po sa inyong lahat

halina't magbilang, isa, dalawa, tatlo, apat

lima, sampu, isang angaw, bilang na di masukat

mabuti't may ganitong araw, nakapagmumulat

"Mathematics is Everywhere", tema sa unang taon

"Mathematics for a Better World", ikalawang taon

"Mathematics Unite" naman ang tema ngayong taon

mapanuri, matatalas, tila tayo'y aahon

bahagi ang numero sa ekonomya ng bansa

upang daigdig ay mapaunlad ng manggagawa

sukat na sukat ang tulay at gusaling nalikha

pati ba pagsasamantala'y nasukat ding sadya

pagbibilang ay bahagi na ng buhay na iwi

matematika'y nabubuhay upang manatili

ang daigdig, o marahil kakamtin din ang mithi

kung paano masukat ang guwang, kilo't sandali

Mabuhay ang Mathematics Day, Araw ng Sipnayan!

upang matuto sa pag-inhinyero't kasaysayan

di lamang numero, paglaban din sa kamangmangan

upang tayo'y makaahon mula sa kahirapan

- gregoriovbituinjr.

03.14.2022

* ang nasa litrato'y ilan lang sa aklat ng makata sa kanyang munting aklatan

* 3.14 (March14) 

HAPPY MATHEMATICS DAY!

Maligayang Araw ng Sipnayan sa inyong lahat!

Bakas sa nadaanan

BAKAS SA NADAANAN

doon sa aking nadaanan

ay may bakas ng nakaraan

kayrami bang pinagdaanan

sa mga panahong nagdaan

nais kong humakbang palayo

subalit saan patutungo

ang tulad kong nasisiphayo

ngunit di naman sumusuko

tititig na ba sa kisame

ang tulad kong dumidiskarte

sa pagtula o mga arte

na isang gawaing masiste

lipunang makatao kaya'y

maitayo ng manggagawa

ang taumbayan ba o madla'y

laban sa sistemang kuhila

ah, kayrami kong naiisip

mga katagang di malirip

solusyon kaya'y mahahagip

upang hininga'y di magsikip

buhay ng dukha'y nakalugmok

ang makata'y nakayukayok

kung palitan sistemang bulok

ito kaya ay matatarok

- gregoriovbituinjr.

03.14.2022

Tawilis at kamatis

TAWILIS AT KAMATIS

kaysarap na almusal

kahit walang pandesal

ang ulam ko'y tawilis

at gulay na kamatis

nakapagpapalusog

ang kamatis na hinog

sarap sa pakiramdam

ng tawilis kong ulam

paminsan lang ganito

may tawilis na prito

mula lawa ng Taal

ang isdang inalmusal

kaygandang kombinasyon

ng inulam kong iyon

sana'y mayroon pa rin

bukas kapag nagising

- gregoriovbituinjr.

03.14.2022

Putikang daan

PUTIKANG DAAN

lulusong ka sa putikan

sa araw-araw ba naman

pagkat doon ang tahanan

sa makipot na looban

pader pa'y nakatagilid

ang banta nito'y di lingid

parang pansakal na lubid

nakakapatid ng litid

sila'y iskwater sa turing

bahay ay di nila angkin

pag minsan, walang makain

may pagpag, di gugutumin

iskwater na nalalantad

sa progresong tila huwad

istrukturang pinaunlad

nagniningning ngunit hubad

umunlad ang mga tulay

at gusaling matitibay

di umunlad dukhang buhay

na animo'y nasa hukay

maalikabok ang daan

lalo't araw, kainitan

dahil kagabi'y umulan

ay nagputik ang lansangan

nasaan na ang pag-unlad

kung putik ang nilalakad

dukha'y ginhawa ang hangad

ngunit sa hirap ay babad

ang daan man ay maputik

kung masa'y magkapitbisig

kung karapatan ay giit

kakamtin din yaong langit

- gregoriovbituinjr.

03.13.2022

* litratong kuha ng makatang gala sa pinuntahang lugar ng maralita

Makipot sa looban

MAKIPOT SA LOOBAN

napakakipot ng daan

sa pinuntahang looban

mga dukha'y tinitirhan

ang lupang di ari't yaman

baka mapalayas sila

sa lupang di pa kanila

nagpapatulong ang masa

sa pananahanan nila

bahay nila'y dikit-dikit

barongbarong, maliliit

pag apoy ay pinarikit

sunog na sa isang saglit

bakit sistema'y ganito

ang tanong nila't tanong ko

silang mamamayan dito

ay iskwater sa bayan ko

araw-gabi, kumakahig

nagugutom, inuusig

silang mga walang tinig

ay dapat magkapitbisig

ganyang buhay sa looban

hirap din ang kalooban

ang kaginhawahang asam

ay kailan makakamtan

- gregoriovbituinjr.

03.13.2022

* litratong kuha ng makatang gala sa pinuntahang lugar ng maralita

Panawagang pangkalusugan

PANAWAGANG PANGKALUSUGAN

mahalagang pundasyon ng mga kababaihan

ang ipaglaban ang kalusugan ng mamamayan

namnamin lamang natin ang kanilang panawagan

nang pinaglalaban nila'y ating maunawaan:

"Pandemya sa kalusuga't kahirapan, wakasan!"

"Universal Health Care ay ipatupad at pondohan!"

panawagang mapagpalaya sa kababaihan

hiling nilang dapat tugunan ng pamahalaan

na kung si Ka Walden Bello na ating kandidato

ay maipanalo't mauupong Bise Pangulo

panawagan ng kababaihan ay sigurado

matutupad ang makatarungang hiling na ito

kaya sa kalusugan ng bayan, kasangga natin

sina Ka Leody de Guzman, lalo si Ka Walden

kaya patuloy nating isulong ang adhikain

sa kalusugan ng sambayanan, ating mithiin

- gregoriovbituinjr.

03.13.2022

* litratong kuha ng makatang gala sa rali noong Araw ng mga Kababaihan    

Hatinggabi na

HATINGGABI NA

hatinggabi na, dapat matulog

lalo't isip na'y kakalog-kalog

subalit mag-ingat pagkat busog

baka bangungutin, maging itlog

hatinggabi na, nagninilay pa

di makatulog, nag-aalala

anong dami ng isyu't problema

ng bansa't naorganisang masa

hatinggabi na, ika'y umidlip

baka may magandang panaginip

solusyon sa problema'y malirip

at pagkagising, may masasagip

hatinggabi na, tulog na tayo

sa munti nating banig, mahal ko

nang makagising ng alas-singko

maagang mamamalengke ako

sinalubong ko ang hatinggabi

na sa pagmamahal ay sakbibi

at sa aking sinta'y nagsisilbi

sa mutya kong kabigha-bighani

- gregoriovbituinjr.

03.12.2022

Ka Leody para sa Climate Justice

KA LEODY PARA SA CLIMATE JUSTICE

pambato natin sa panguluhan

Ka Leody de Guzman ang ngalan

manggagawa, makakalikasan

may prinsipyo, may paninindigan

sa Climate Walk, siya'y nakiisa

ako'y saksi nang siya'y sumama

sa unang araw d'un sa Luneta

santaon matapos ang Yolanda

Climate Justice ay kanyang unawa

bilang isang lider-manggagawa

pinaliliwanag niyang sadya

kalagayan ng klima sa madla

ako ang kanilang kinatawan

sa Climate Walk, mahabang lakaran

mula Luneta hanggang Tacloban

kinaya rin, nakatapos naman

Ka Leody'y ayaw ng Just-Tiis

ang kanyang adhika'y Climate Justice

climate emergency'y bigyang hugis

nang serbisyo sa tao'y bumilis

sa Climate Justice, ating pambato

si Ka Leody para pangulo

kung nais natin ng pagbabago

Manggagawa Naman ang iboto

- gregoriovbituinjr.

03.12.2022

Ang panawagang "Go for Green. Go for Real Zero Emission."

ANG PANAWAGANG "GO FOR GREEN. GO FOR REAL ZERO EMISSIONS."

sa t-shirt may tatak: "Go for Green.

Go for Real Zero Emissions." din

matay ko man anong isipin

ngunit pagninilay-nilayin

hinggil sa buong daigdigan

hinggil sa ating kalikasan

mga asap sa kalangitan

ang usok sa kapaligiran

kaya dapat walang polusyon

dapat sero na ang emisyon

walang usok, wala na iyon

dahil walang coal plants na ngayon

sa mundo'y di na nagsusunog

niyang fossil fuel, ng dapog

panawagang ito'y matunog

pagkat isyung ito'y nabantog

ngunit di pa rin mapigilan

negosyo kasing malakihan

limpak-limpak kung pagtubuan

ng kapitalistang gahaman

anong dapat nating magawa

sa sistema nilang kuhila

paano nga ba mawawala

zero emission ay kamting sadya

- gregoriovbituinjr.

03.11.2022

* litratong kuha ng makatang gala sa isang public forum na nadaluhan

Hustisya sa Klima, Ngayon Na!

HUSTISYA SA KLIMA, NGAYON NA

dinig ko ang talumpati ni David D'Angelo

talagang mapapaisip ka kapag ninamnam mo

lalo't sinabi ang pag-iinit ng klima, mundo

na sa loob ng walong taon, lalala pa ito

habol natin, huwag umabot ng 1.5 degree

ang pag-iinit ng mundo, ngunit kanyang snabi

doon sa nilahukang rali, ito pa'y titindi

baka sa walong taon, abot na'y dalawang degri

nakababahala ang nangyayari sa daigdig

habang ang bansang Ukraine ay pilit na nilulupig

dahil daw sa fossil fuel, gerang nakanginginig

sa nangyayaring climate change pa'y anong dapat tindig

si D'Angelo, sa Senado'y kandidato natin

sa kanyang talumpati ay sinabi nang mariin

pagsusunog ng fossil fuel ay dapat pigilin

pagpapatakbo ng coal plants ay dapat sawatain

subalit mga iyon ay pagbabakasakali

makapangyarihang bansa'y gagawin ang mungkahi?

malaking katanungan, di iyon gayon kadali

dapat ngang mag-organisa para sa ating mithi

dapat Annex 1 countries ay pagbayarang totoo

ang nangyayari sa lahat ng bansang apektado

karaniwang mamamayan ay kumilos ding todo

upang mapigilan na ang nagaganap na ito

asam nating itayo ang makataong lipunan

na walang sinusunog na fossil fuel o coal plants

kung saan pantay, walang mahirap, walang mayaman

may karapatang pantao't hustisyang panlipunan

- gregoriovbituinjr.

03.11.2022

* litratong kuha ng makatang gala noong Women's Day

Sa pag-ihi

SA PAG-IHI

bakit ka iihi sa kalsada

lalo sa kahabaan ng EDSA

aba'y di mo na talaga kaya?

at nasa pantog mo'y lalabas na?

pinaskil: "Bawal Umihi Dito"

nilagay sa daanan ng tao

huwag umihi saan mo gusto

ito'y paalala namang wasto

pag namultahan, aba'y magastos

kaya paskil ay sundin mong lubos

parang sinabing "Huwag kang bastos"

sa trapong laos, dapat makutos

sa magkabila'y huwag umihi

pantog man ay nanggagalaiti

humanap ng C.R., magmadali

lagi nating habaan ang pisi

kaya ihi'y talagang tiisin

kaysa naman tayo'y pagmultahin

ng kung sinong nais kumita rin

kaya saan may C.R., alamin

halina't umihi lang sa tama

nang di maabala ng kuhila

o buwitreng animo'y tumama

sa lotto pag multahan kang bigla

- gregoriovbituinjr.

03.10.2022

* litratong kuha ng makatang gala sa isang bangketa sa EDSA

Si David D'Angelo noong Women's Day

SI DAVID D'ANGELO NOONG WOMEN'S DAY

makakalikasang pambato natin sa Senado

sa Araw ng Kababaihan kasamang dumalo

nagtalumpati sa Oriang si David D'Angelo

sa isyu ng klima'y nagpaliwanag pang totoo

sigaw niya: Mabuhay ang mga kababaihan!

binanggit ang magiting na si Gabriela Silang

nabanggit din si Bonifacio ngunit di si Oriang

tila di kilala, Lakambini ng Katipunan

gayunman, talumpati niya sa klima'y matindi

pag-init ng mundo'y baka umabot ng two degree

sa loob ng walong taon, na pag ito'y nangyari

pagtaas ng tubig-alat, tayo'y magiging saksi

nakadaupangpalad sa unang pagkakataon

kaya sa kanya ako'y nag-selfie rin naman doon

si David D'Angelo, senador nating may misyon

ating ipanalo sa Senado, magandang layon

- gregoriovbituinjr.

03.09.2022

* litratong kuha ng makatang gala sa nilahukang rali, Marso 8, 2022

Dahon

DAHON

"Tayo'y Mga Dahon Lamang," anang awit ng ASIN

dahon sa matatag na punong kinapitan natin

pakinggan mo ang awit, talinghaga'y anong lalim

subalit mauunawaan din ng tulad natin

nakakapit sa sanga'y matibay kahit maginaw

ang gabing ang mga kuliglig ay pumapalahaw

ang bitaminang pampalakas ay sinag ng araw

dahon tayong pag nalagas sa puno'y maninilaw

tayo'y dahon ng punong matatag at nasa lupa

di tulad ng elitistang mapangmata sa dukha

tayo'y karaniwang taong nabuhay sa paggawa

ang matatag na puno'y daigdig, o buong bansa

dahong di parehas ang tubo, iba-ibang uri

may mapagsamantala sa lipunan, naghahari

may laksa-laksang naghihirap at kumain dili

may nabubuhay sa lakas-paggawa, anluwagi

kaya kami'y nangangarap ng pantay na lipunan

na sistema'y di nakakasira ng kalikasan

na hustisya'y di para sa mayaman o iilan

sa yaman ng lipunan, dapat lahat makinabang

oo, tayo'y dahon lamang sa munti nating mundo

ngunit dapat karapatang pantao'y irespeto

hustisyang panlipunan ay pairaling totoo

at itayo na natin ang lipunang makatao

- gregoriovbituinjr.

03.07.2022    

Nagbabagong klima

NAGBABAGONG KLIMA

nakakabagabag na sa tao

ang klimang nagpapabago-bago

tumitindi ang danas na bagyo

na sa madla'y nakakaapekto

mga nasalanta'y nagtitiis

sa panahong nagbabagong-hugis

kaya sigaw ng tao'y di mintis

sa panawagan ng Climate Justice

at sa pandaigdigang usapin

climate emergency'y talakay din

pag-iinit ng mundo'y isipin

1.5 degree'y huwag abutin

sa mukha ng nasalanta'y bakas

ang sigwang kanilang dinaranas

Climate Justice ang sa puso'y atas

para sa mundo, bayan, at bukas

- gregoriovbituinjr.

03.06.2022

Sa kawayanan

SA KAWAYANAN

napatitig ako sa kawayan

nang mapadalaw sa pamayanan

ng maralita sa isang bayan

at kayrami kong napagnilayan

kalikasan, alagaan natin

kapaligiran, ating linisin

paano ang dapat nating gawin

nang luminis ang maruming hangin

nakakahilo na ang polusyon

sa mga lungsod, bayan at nayon

dapat may magawa tayo ngayon

para sa sunod na henerasyon

sa kawayanan ay napatitig

nanilay, dapat tayong tumindig

halina't tayo'y magkapitbisig

para sa kalikasan, daigdig

- gregoriovbituinjr.

03.06.2022

- litratong kuha ng makatang gala sa isang sityo sa Antipolo

Pagtunton

PAGTUNTON

hinanap ko ang patutunguhan

at pasikot-sikot pa ang daan

sumakay ng traysikel na lamang

uno singkwenta ang binayaran

ubos ang perang tumataginting

upang lugar lamang ay marating

upang maralita'y kausapin

hinggil sa kanilang suliranin

kaysariwa ng hangin sa nayon

kaya ang loob ko'y huminahon

anong saya kong magtungo roon

binaybay, buti't aking natunton

sa tsuper ng traysikel, salamat

ako'y natulungan niyang sukat

- gregoriovbituinjr.

03.05.2022

Tarp na tela

TARP NA TELA

dalawang taal na taga-Pasig

na tangan ang tarpolin na tela

nagsalita sila'y ating dinig

nang midya'y kinapanayam sila

na tinanong ukol sa tarpoling

makakalikasan, ano iyon

di na plastik ang ginamit nila

na parapernalyang pang-eleksyon

kayganda ng katwirang matuwid

kandidato'y makakalikasan

dito pa lang, may mensaheng hatid

kalikasan ay pangalagaan

paninindigan ng kandidato

sa tumitindi nang bagyo't klima

paninindigang para sa mundo

prinsipyadong tindig, makamasa

"Climate Justice Now!" ang panawagan

sa bawat bansa, buong daigdig

na platapormang kanilang tangan

kung saan dapat magkapitbisig

ah, ito'y isa nang pagmumulat

pagkasira ng mundo'y sinuri

sa kanila'y maraming salamat

sana ang line-up nila'y magwagi

- gregoriovbituinjr.

03.04.2022

* litratong kuha ng makatang gala matapos ang forum ng PasigLibre, 03.01.2022

Basura'y huwag itapon dito

BASURA'Y HUWAG ITAPON DITO

para daw sa pagpapanatili

ng kalinisan sa buong kampus

pagtatapon ng basura'y hindi

sa kung saan lang, dapat matapos

ang gayong pangit na kaasalan

na kung saan-saan nagtatapon

ng basurang di mo na malaman

batid mo sa paskil anong layon

buong pamantasan kung malinis

ang estudyante'y di mandidiri

sa kapaligirang di malinis

dahil lalangawin ka, kadiri

kung basura'y ilagay sa wasto

pamantasa'y kaiga-igaya

sa karunungan upang matuto

ang mga estudyante'y masaya

iyan ang kahulugan ng paskil

kaya 'yung magtatapon kung saan

ay di lang burara kundi sutil

at kadiri ang kaugalian

- gregoriovbituinjr.

03.02.2022

Huwag magyosi

HUWAG MAGYOSI

pininta sa dyip ang "No Smoking!"

at may "Please" pa, aba'y anong galing!

pakiusap na ito't matining

sa mananakay, tao'y nagising

patakaran sa lupang hinirang

nang kapwa pasahero'y igalang

kung may magyosi sa dyip, malamang

baka may magkasakit na lamang

paano pag nagkasakit tayo

biglang hinika, biglang inubo

babayaran ng nagyosing ito?

ang nagkasakit na pasahero?

salamat at tayo'y sinasagip

mula sa bantang pagkakasakit

buti't hininga'y di na sumikip

dahil sa taong yosi ang hirit

may ismoking erya, doon sila

huwag sa dyip o harap ng masa

ito'y pagrespeto ngang talaga

sa pasaherong tulad din nila

- gregoriovbituinjr.

03.02.2022

Makakalikasan para sa Senado

MAKAKALIKASAN PARA SA SENADO

para sa kalikasan ang dalawa'y tumatakbo

mga environmental advocates silang totoo

halina't tandaan ang pangalang ROY CABONEGRO

at DAVID D'ANGELO, kandidato sa Senado

si Roy Cabonegro ay matagal kong nakasama

sa isyung makakalikasan sa akin humila

Environmental Advocates Students Collective pa

samahan sa iba't ibang pamantasan talaga

si David D'Angelo ay minsan nang napakinggan

nang sa Partido Lakas ng Masa'y naimbitahang

plataporma'y ilahad bilang Senador ng bayan

zoom meeting iyon, tunay siyang makakalikasan

sa pagka-Senador ay atin silang ipagwagi

ang dalawang itong sa kalikasan ay may budhi

at kung maging Senador ay magsisilbing masidhi

sa taumbayan, sa kalikasan, na ating mithi

- gregoriovbituinjr.

03.01.2022