Sa Pandaigdigang Araw ng mga Katutubo

SA PANDAIGDIGANG ARAW NG MGA KATUTUBO

(International Day of the World's Indigenous Peoples)

sa pandaigdigang araw ng mga katutubo

pagpupugay ay pinaaabot nang taospuso

silang may karapatang dapat igalang ng buo

taong dapat kilanlin, saanmang panig ng mundo

salamat sa United Nations, may ganitong araw

katutubo sa bawat bansa'y igalang na tunay

lupang ninuno'y di ariin, di dapat magalaw

ng kapitalistang kamatayan namin ang pakay

ang katutubo'y nagpoprotekta sa kalikasan

na madalas mataboy dahil sa mga minahan

sinisira ng negosyo ang kanilang tahanan

inaagaw ng may kapital pati kalupaan

katutubo'y huwag ituring na uring kaybaba

sapagkat tao ring may malayang kultura't diwa

na pawang naghahangad ng daigdig na payapa

na dapat maprotektahan maging sa ating bansa

- gregoriovbituinjr.

08.09.2024

Nanghihingi si Muning

NANGHIHINGI SI MUNING

ako'y taong naritong natutuwa

sa mga inaalagaang pusa

pag ako'y nakita nilang dumating

agad silang sa akin ay dadaing

nais ng pagkain, nakikiamot

sila'y bibigyan ko't di nagdadamot

kung may maiabot lang sa kanila

sila'y mapapakain ko talaga

tulad ni Muning na aking kaharap

walang ibang sa kanila'y lumingap

bahala sila sa kanilang buhay

malalaki na sila, anang nanay

matutong daga'y kanilang mahuli

upang di gutumin sa bandang huli

habang ako naman ay nalulugod

na magbahagi ng munti kong kayod

- gregoriovbituinjr.

08.09.2024

* mapapanood ang bidyo sa kawing na: https://fb.watch/tRHbM9vyfh/ 

Hangal o banal?

HANGAL O BANAL?

ako ba'y isang makatang hangal

o ituring mong makatang banal

na sabi nila'y nakatatagal

sa dagok ng mag-asawang sampal

hinahanap ko'y mga salita

na mangyaring palasak ang diwa

kung di man makabago o luma

upang magamit ko sa pagkatha

sa pagsasaknong ay nagkakayod

sinasalansan bawat taludtod

maging bolpen o lapis na upod

sa anumang digma'y sumusugod

kahit diksyunaryo'y binabasa

na para bagang isang nobela

ganyan yata ang makatang aba

naligaw at nanliligaw pala

hangal o banal ba'y iyong tanong?

ang makata'y di nagmamarunong

niyakap ko lang maging ay yaong

mananaludtod at mananaknong

- gregoriovbituinjr.

08.09.2024

* litratong kuha ni misis sa Art in Island sa 15th Ave., Cubao, QC

Boxer Aira Villegas, Bronze medalist sa Paris Olympics

BOXER AIRA VILLEGAS, BRONZE MEDALIST SA PARIS OLYMPICS

sa unang Olympics mo, nagkatansong medalya ka

boxer Aira Villegas, pambihira ka talaga

ginawa mo ang lahat sa abot ng makakaya

subalit sa huling laban mo'y tinalo ka niya

ayos lang iyon, ngalan mo'y nakaukit na roon

sa pantyon ng mga kilalang boksingero doon

magaling ka, pagbutihin mo pa ang iyong misyon

pagkat marami ka pang laban at pagkakataon

di kami mauubusan ng pamuring salita

sa kagaya mong atletang buo ang puso't diwa

pasasalamat ngayong Buwan ng Wikang Pambansa

ang aming masasabi, inspirasyon ka't dakila

laban lang, ang pagkatalo mo'y huwag ikalumbay

ipagpatuloy mo lamang ang iyong paglalakbay

may gintong medalya pa ring sa iyo'y naghihintay

O, Aira Villegas, kami'y taos na nagpupugay!

- gregoriovbituinjr.

08.08.2024

* ulat mula sa pahayagang Bulgar, Abante at Pilipino Star Ngayon, Agosto 8, 2024

Paihi

PAIHI

ngayong Buwan ng Wikang Pambansa, tayo'y magsuri

ng mga salitang luma, bago, kapuri-puri

aba'y baka naman may salitang kamuhi-muhi

datapwat umuunlad naman ang wika palagi

sa balita'y may napansin ako, yaong 'PAIHI'

hinggil sa oil spill ng barko, amoy ba'y MAPANGHI

ipinaliwanag naman sa ulat ang 'PAIHI'

'you read between the lines' tila ginagawa PALAGI

ito raw ay langis ng malaking sasakyang dagat

nililipat sa mas maliit habang nasa dagat

upang sa pagbabayad ng buwis ay makaiwas

ngayon, langis sa dagat ay patuloy ang pagtagas

ayon sa ulat, tumaob ang MT Terranova

pati MTKR Jason Bradley ay lumubog pa

habang sumadsad sa baybayin ang MV Mirola

lahat sa Bataan ang pinangyarihang probinsya

may tagas ang tatlong sasakyang pandagat o barko

ngayon ay naglalabas daw ng libo-libong litro

ng gasolina sa Manila Bay, kaytindi nito

pangharang daw sa oil spill ay buhok daw ng tao

- gregoriovbituinjr.

08.08.2024

* ulat mula sa headline at pahina 2 ng pahayagang Abante, Agosto 5, 2024

Binidyong paggisa

BINIDYONG PAGGISA

binidyuhan ko pa

ang aking paggisa

nais kong makuha

kung gawa'y tama ba

magsuri'y ganito

minsan binibidyo

gawa ba'y paano

paggisa ba'y wasto

ganyan ang ginawa

ng abang makata

parang kumakatha

ng tula at dula

nagpapasalamat

ang katawang payat

sapagkat nabundat

sa tanghaling tapat

- gregoriovbituinjr.

08.08.2024

* ang bidyo ay mapapanood sa kawing na: https://fb.watch/tQ2LaklAyy

Ginisang kangkong

GINISANG KANGKONG

may natirang kangkong / si misis kagabi

ang dulong bahagi'y / matigas daw kasi

ayokong sayangin / at pinarti-parte

yaong tangkay upang / gisahing maigi

ibabasura na't / di ko na natiis

plano kong paggisa'y / di naman nagmintis

ang sahog ko'y bawang, / sibuyas, kamatis

tanghalian nitong / katawang manipis

maaari namang / itanim kong binhi

ang dulo ng kangkong, / magbakasakali

subalit naiba / ang isip ko't mithi

ginisa kong tunay / doon sa kawali

tara nang kumain, / ako'y saluhan n'yo

sa pananghaliang / luto kong totoo

kung sakali namang / mabubusog kayo

maraming salamat, / pinasaya ako

- gregoriovbituinjr.

08.08.2024