IRAS AT AGAS-AS
bagamat narinig ko na sa lalawigan
pag di ginagamit ay di na matandaan
may salitang sa krosword ko unang nalaman
palibhasa'y tanong na dapat masagutan
Siyam Pahalang - 'Paggawa ng asin': IRAS
sa Dalawampu't Tatlo Pababa: AGAS-AS
yaong 'Ingay ng hangin', buti't nawawatas
nitong diwa't wastong sagot ay nakakatas
IRAS at AGAS-AS, malalim na salita
na nang mabatid ay ginamit na sa tula
wala man ang talasalitaan kong sadya
ay nasagot pa rin ang hanap na kataga
kasi naman ay palaisipan ang hilig
pagmamasdan ang krosword, sadyang nakatitig
mata, diwa't pluma, walang galaw ang bibig
at pag nabuo animo'y nakapanlupig
- gregoriovbituinjr.
01.21.2025
* krosword mula sa Pilipino Star Ngayon, 12.16.2024, p.10
Walang komento:
Mag-post ng isang Komento