PUNA SA BITAY NI BATO
ang hepe ng tokhang, senador na ngayon
ay nagpanukala raw ng pagbabalik
nitong death penalty, kayo ba'y sang-ayon
bagamat ang puna ay mula sa komiks
aking sinaliksik ang mga balita
may panukala ngang gayon ang senador
subalit sa komiks ay mahahalata
pangmahirap ang death penalty, que horror
paano naman pag ang sentensya'y mali
maibabalik ba ang nawalang buhay
ano ba talaga ang kanilang mithi?
dati, gawa'y tokhang, ngayon nama'y bitay
si Pooroy, pinuna'y panukalang iyan
mahihirap lang daw yaong mabibitay
dalawang kaso nga'y suriin at tingnan
mayamang Jalosjos, dukhang Echegaray
- gregoriovbituinjr.
07.16.2025
* komiks mula sa pahayagang Remate, Hulyo 16, 2025, p.3
Walang komento:
Mag-post ng isang Komento